ՀՀ հակակոռուպցիոն դատարանի մոտ իր գործով դատական նիստից հետո լրագրողների հետ զրույցում «Ուժեղ Հայաստան» դաշինքի առաջնորդ, գործարար Սամվել Կարապետյանը հայտարարել է, որ շուտով կբացվեն երկու շատ կարևոր ոլորտում Հայաստանի երևի ամենախոշոր հիմնարկները։
«Իհարկե, շուտով ձեզ կհրավիրենք, երկու շատ կարևոր ոլորտում Հայաստանի երևի ամենախոշոր հիմնարկները կբացենք։ Սա մեր երկիրն է, Փաշինյանն ընդամենը տուրիստ է, ինքը կա, չկա, մեզ համար նշանակություն չունի։ Մենք ամեն օր ամեն ինչ անելու ենք»,- ասաց Կարապետյանը։
Նրա խոսքերն ուղղված էին նաև ՀՀ կառավարության կողմից Հայաստանի էլեկտրական ցանցեր (ՀԷՑ) ընկերության բաժնետոմսերի գնման շուրջ բանակցությունների ընթացքին։ Պատասխանելով ՀԷՑ-ի ժամանակավոր կառավարիչ Ռոմանոս Պետրոսյանի պնդումներին, թե նախկին կառավարիչները ընկերությունը վատ վիճակում են թողել, Կարապետյանը հակադարձեց՝ նման բան չկա։
«Բա պատկերացնո՞ւմ եք՝ մեզ ինչ են թողել, իրենք գիտեին՝ մի հատ «Մերսեդես» է կանգնած, նստելու են, քշե՞ն։ Դե տեսան՝ ինչ էինք մենք ստացել, բայց մենք իրենց թողել էինք շատ նորմալ վիճակում, հիմա գնացեք ու նայեք»,- ասաց նա՝ շեշտադրելով, որ իրենք ընկերությունը հանձնել են ողջունելի վիճակում։
Հիշեցնենք, որ ՀՀ կառավարությունը մայիսի 8-ին առաջարկել էր 380 000 դոլար գնի ՀԷՑ-ի բաժնետոմսերը, սակայն Սամվել Կարապետյանը գումարի այս չափը համարել էր անընդունելի։
