ՀՀ դատախազությունն այսօր հայտնեց, որ Հայկ Հակոբյան անունով ոստիկանության աշխատողի նկատմամբ հարուցվել է քրեական վարույթ։
Ինչպես հայտնի դարձավ, դատախազությունը հանրային քրեական հետապնդում է հարուցել Հայկ Հակոբյանի նկատմամբ՝ ՀՀ քրեական օրենսգրքի 450-րդ հոդվածի 1-ին մասի կողմից։ Այս հոդվածի համաձայն, նախատեսվում է ազատազրկում՝ 4-ից 8 տարի ժամկետով։
Դեպքի մասին տեսանյութը համացանցում տարածվեց փետրվարի 3-ին։ Տեսանյութում երևում էր, թե ինչպես է ենթադրաբար ոստիկանության բաժանմունքում օպերլիազոր Հայկ Հակոբյանը խոշտանգում և հայհոյում տղամարդուն, որը, լրագրող Սյուսի Բադոյանի տեղեկություններով, ենթադրյալ հանցագործի հարազատն է։
ՀՀ ՆԳՆ ոստիկանությունը նախապես հայտնել էր, որ անձի նկատմամբ բռնություն իրականացրած և հայհոյանքներ հնչեցրած ոստիկանի լիազորությունները կասեցվել են։
Հիշեցնենք, որ այս դեպքով ՀՀ մարդու իրավունքների պաշտպանը փետրվարի 4-ին համապատասխան գրություն էր ուղարկել ՀՀ գլխավոր դատախազություն՝ բռնություն կատարած ոստիկանության աշխատողի դեպքով քրեական վարույթ նախաձեռնելու և անձի արարքին քրեաիրավական գնահատական տալու նպատակով։
