Ադրբեջանի փոխարտգործնախարար Էլնուր Մամեդովը հայտարարել է, որ անհետ կորած անձանց խնդրի լուծումը նպաստում է Հարավային Կովկասում խաղաղության ամրապնդմանը։ Այս հայտարարությունը նա արել է «Ժամանակակից մոտեցումներ և համագործակցության ամրապնդում անհետ կորած անձանց խնդրի լուծման հարցում» միջազգային համաժողովի ժամանակ ելույթ ունենալիս։
Ըստ փոխարտգործնախարարի՝ միջազգային մարդասիրական իրավունքը պարտավորեցնում է պետություններին կանխել մարդկանց անհետացման դեպքերը զինված հակամարտությունների ժամանակ և պարզել անհետ կորած անձանց ճակատագրերը։
Նույն համաժողովի ընթացքում Ադրբեջանի պետական անվտանգության ծառայության պետի տեղակալ Շարաֆատ Հասանովն ավելի վաղ հայտարարել էր, որ Ադրբեջանը և Հայաստանը կստեղծեն հնարավորություն իրենց քաղաքացիների համար՝ անհետ կորած անձանց և թաղման վայրերի վերաբերյալ գաղտնի տեղեկություններ տրամադրելու համար։
Պաշտոնական տվյալներով՝ 1988-2005 թվականներին հայկական կողմից անհետ կորել է 437 մարդ, որոնցից 224-ը զինծառայող են, իսկ 213-ը՝ խաղաղ բնակիչ։ 2020 թվականի 44-օրյա պատերազմի հետևանքով անհետ կորել է 191 մարդ, իսկ 2023 թվականի սեպտեմբերին Ստեփանակերտի բենզինի պահեստում տեղի ունեցած պայթյունից հետո՝ ևս 22 մարդ։
Ադրբեջանը 2020 թվականից ի վեր Հայաստանին է փոխանցել մարտադաշտում հայտնաբերված ավելի քան 2000 զինծառայողի աճյուններ։
