Հայաստանը նպատակ ունի մինչև 2030 թվականը բացել հաղորդակցությունները և սահմանները Թուրքիայի և Ադրբեջանի հետ։ Այս մասին հայտարարել է Հայաստանի արտաքին գործերի նախարարի տեղակալ Վահան Կոստանյանը։
«Մեր տեսլականն այն է, որ մինչև 2030 թվականը մենք կունենանք բաց հաղորդակցություններ և բաց սահմաններ մեր երկու հարևանների՝ Թուրքիայի և Ադրբեջանի հետ, որոնց հետ, ցավոք, սահմանները դեռևս փակ են», – ասել է նա։
Վահան Կոստանյանը նշել է, որ Երևանը շարունակում է աշխատանքը տարածաշրջանային տրանսպորտային նախագծերի շուրջ և հարևան երկրների կողմից ավելի մեծ բացության նշաններ է տեսնում։ Փոխնախարարը չի բացառել, որ հաղորդակցությունների բացումը կարող է տեղի ունենալ նաև ավելի շուտ։
Հայաստանը գործակցում է նաև Եվրոպական միության հետ տրանսպորտային ենթակառուցվածքների արդիականացման հարցերում, ներառյալ նոր սահմանային անցակետերի կառուցումն ու ավտոմոբիլային ճանապարհների զարգացումը՝ ապագա տարանցիկ փոխադրումների ծավալները մեծացնելու նպատակով։
Կոստանյանը նաև նշել է, որ ավանդական առևտրային երթուղիների անկայունությունն ու գլոբալ լոգիստիկ շղթաների խափանումները մեծացնում են «Միջին միջանցքի» (Middle Corridor) նշանակությունը և նոր հնարավորություններ ստեղծում տարածաշրջանի պետությունների համար։ Ըստ փոխնախարարի՝ տրանսպորտային փոխկապակցվածության զարգացումը ոչ միայն նպաստում է առևտրի աճին, այլև ամրապնդում է կայունությունը Հարավային Կովկասում՝ տարածաշրջանի երկրների միջև տնտեսական փոխկախվածության մեծացման հաշվին։ Հայաստանը մտադիր է բեռների անխոչընդոտ տեղաշարժ ապահովել «Միջին միջանցքի» իր հատվածով։
