Երևան, 29 մայիսի – Ռուսաստանի Դաշնության փոխվարչապետ Ալեքսեյ Օվերչուկը հայտարարել է, որ Հայաստանը ցանկանում է մնալ Եվրասիական տնտեսական միության (ԵԱՏՄ) կազմում, սակայն այդ հարցում առկա են որոշակի նրբություններ։
Այս հայտարարությունը նա արել է ի պատասխան այն հարցին, թե արդյոք Աստանայում ընթացող ԵԱՏՄ գագաթնաժողովում հաջողվել է որևէ հարց համաձայնեցնել Հայաստանի հետ։
«Հայաստանը միշտ հավատարիմ է իր դիրքորոշմանը, և մենք տեսնում ենք, որ իրենք ցանկանում են մնալ Եվրասիական տնտեսական միությունում։ Բայց այստեղ կան նրբություններ», – նշել է Օվերչուկը։
Հարցին, թե երբ կհրապարակվի Հայաստանի վերաբերյալ ԵԱՏՄ հայտարարության ամբողջական բովանդակությունը, փոխվարչապետը կոչ է արել զինվել համբերությամբ։ Նրա խոսքով՝ այս հարցի շուրջ գլխավոր որոշումները կայացնում է Ռուսաստանի Դաշնության նախագահը, որը շուտով կառաջարկի լրացուցիչ տեղեկություններ։
Ավելի վաղ ՌԴ նախագահի օգնական Յուրի Ուշակովը հայտնել էր, որ ԵԱՏՄ երկրների ղեկավարները Հայաստանի շուրջ ստեղծված իրավիճակի վերաբերյալ գործնական քննարկում են անցկացրել և հայտարարություն են ընդունել։
Եվրասիական տնտեսական միությունը ստեղծվել է 12 տարի առաջ։ Այն ներառում է Ռուսաստանը, Հայաստանը, Բելառուսը, Ղազախստանը և Ղրղզստանը։ Միության անդամ պետությունների ընդհանուր ՀՆԱ-ն ստեղծումից ի վեր աճել է 1.6 տրիլիոն դոլարից մինչև 3.01 տրիլիոն դոլար, անդամ պետությունների միջև փոխադարձ առևտրի ծավալը կրկնապատկվել է, իսկ երրորդ երկրների հետ առևտրաշրջանառությունն աճել է 72%-ով։ Կանխատեսումների համաձայն՝ մինչև 2025 թվականի ավարտը միության ՀՆԱ-ն կաճի 1.7%-ով։
