Հուլիսի 12-19-ը Երևանում կկայանա «Ոսկե ծիրան» միջազգային կինոփառատոնի 23-րդ հրավիրումը, որի ընթացքում կցուցադրվի 40 երկրի 90 ֆիլմ։ Այս մասին հայտարարեց փառատոնի տնօրեն և գեղարվեստական ղեկավար Կարեն Ավետիսյանը։
Փառատոնի ծրագիրը կլրացվի համաշխարհային ճանաչում ունեցող ռեժիսորների, դերասանների և կինոքննադատների հետ հանդիպումներով, վարպետության դասերով և ստեղծագործական քննարկումներով։
«Ոսկե ծիրան» կինոփառատոնը կբացվի Թամարա Ստեփանյանի «Արտոյի երկիրը» հայ-ֆրանսիական ֆիլմով, որը նկարահանվել է Հայաստանում հայ և ֆրանսիացի դերասանների մասնակցությամբ։
Այս տարվա փառատոնի ժյուրիի նախագահն է Ջեսիկա Հաուսները, որը ժամանակակից ավստրիական կինոյի առաջատար դեմքերից է։ Նրա ֆիլմերի պրեմիերաները կայացել են Կաննում և Վենետիկում՝ արժանանալով լայն ճանաչման ժանրային կինոյում նորարարական մոտեցման համար։
Ժյուրիի կազմում են նաև մի քանի այլ հեղինակավոր անձինք։ Դրանցից է իռլանդա-շոտլանդացի կինոպատմաբան և ռեժիսոր Մարկ Քազընսը, որի «Կինոյի պատմությունը. Ոդիսական» վավերագրական սերիալը դարձել է ժամանակակից կինոքննադատության հիմնարար գործերից մեկը։ Ժյուրիի անդամ է նաև արգենտինացի դերասան Նաուել Պերես Բիսկայարտը, որը հայտնի է Ռոբեն Կամպիյոյի «Րոպեում 120 հարված» ֆիլմում իր գլխավոր դերակատարությամբ։
Կինոփառատոնի կազմակերպիչները կրկին հրաժարվել են ավանդական կարմիր գորգից՝ այն փոխարինելով ռուս նկարիչ Իգոր Գուրովիչի բացառիկ դիզայներական գորգով։
Երևանի քաղաքապետարանը հինգերորդ տարին անընդմեջ մայրաքաղաքի գլխավոր փառատոներից մեկի՝ «Ոսկե ծիրանի» գլխավոր գործընկերն ու հովանավորն է։ Այս տարի փառատոնային միջոցառումների համար հատկացվել է 130 միլիոն դրամ։
ՀՀ կրթության, գիտության, մշակույթի և սպորտի փոխնախարար Տիգրան Վիրաբյանը նշեց, որ «Ոսկե ծիրանը» վաղուց կարևոր իրադարձություն է ոչ միայն հայկական կինոյի, այլև միջազգային հանդիսատեսի համար։ Փառատոնի ընթացքում Հայաստան կժամանեն համաշխարհային ճանաչում ունեցող ռեժիսորներ, դերասաններ և ոլորտի մասնագետներ, որոնք իրենց փորձն ու արվեստը կներկայացնեն հայ հանդիսատեսին՝ ստեղծելով երկխոսության, նոր գաղափարների և մշակութային փոխանակման բացառիկ հարթակ։
