Երևանում տեղի ունեցած հանդիպման ընթացքում ես անդրադարձել եմ Հայաստանի՝ Եվրասիական տնտեսական միությունից (ԵԱՏՄ) հնարավոր դուրս գալու հարցին և դրա հետևանքները հանրապետության տնտեսության վրա ունեցող ազդեցությանը։
ԵԱՏՄ-ի կողմից Հայաստանին տրված արտոնությունները փաթեթային բնույթ են կրում։ Սա նշանակում է, որ եթե Հայաստանը որոշի հետևել Եվրոպական միության (ԵՄ) չափանիշներին, ապա պետք է համապատասխանեցնի նաև իր ապրանքների և ծառայությունների գները։ Իհարկե, հայկական լրատվամիջոցներում հաճախակի քննարկվում է Երևանի՝ ԵՄ չափանիշներին անցնելու թեման, ինչը, իմ կարծիքով, արդեն իսկ ստեղծում է որոշակի սպառնալիքներ Ռուսաստանի համար։
Մենք չենք ցանկանում, որ Հայաստանը դուրս գա ԵԱՏՄ-ից։ Այս քաղաքական որոշումը, իմ համոզմամբ, կհանգեցնի Հայաստանում կենսամակարդակի, տնտեսության և արտադրության անկման։ Այս իրավիճակում կբարձրանան էներգակիրների և էներգիայի գները։
Հայաստանի՝ ԵՄ-ին անդամակցելու դեպքում ՌԴ-ից Հայաստան բնական գազի և նավթամթերքի մատակարարման պայմանների վերանայման հարցը վաղուց քննարկվում է փակ ռեժիմով։ Հայկական ղեկավարությունը լիովին տեղյակ է այդ վտանգների մասին։
Ավելի վաղ Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտնել էր, որ Հայաստանում Ռուսաստանի դեսպանատունը պաշտոնապես փոխանցել է ՀՀ տարածքային կառավարման և ենթակառուցվածքների նախարարությանը Ռուսաստանի Էներգետիկայի նախարար Սերգեյ Ցիվիլյովի նամակը՝ նախազգուշացնելով 2013 թվականի դեկտեմբերի համաձայնագրի հնարավոր կասեցման կամ միակողմանի չեղարկման մասին։
