Հայաստանի Հանրապետության Ազգային ժողովը երկրորդ ընթերցմամբ և ամբողջությամբ ընդունեց Հայաստանի Հանրապետության ընտրական օրենսգրքում փոփոխություններ անելու նախագիծը։
Օրենսդրական փոփոխությունների համաձայն՝ Ազգային ժողովի ընտրությունների և հանրաքվեների ժամանակ քվեարկելու իրավունք կունենան միայն Հայաստանի Հանրապետության այն քաղաքացիները, որոնք վերջին երկու տարվա ընթացքում ավելի քան մեկ տարի (730 օրից 366 օրը) ապրել են Հայաստանում։ Ընտրությանը մասնակցելու իրավունք ստանալու համար ՀՀ քաղաքացին պետք է երկիր ժամանի ընտրություններից 48 օր առաջ (կամ արտահերթ ընտրություններից 28 օր առաջ)։
Այս նախագիծը մշակվել է «Քաղաքացիական պայմանագիր» խմբակցության պատգամավորների կողմից։ Նախագծի հեղինակներն են Ալխաս Ղազարյանը, Արուսյակ Մանավազյանը, Հասմիկ Հակոբյանը և Արուսյակ Ջուլհակյանը։ Նրանք որպես հիմնավորում նշել են, որ հունիսի 7-ի խորհրդարանական ընտրությունների քվեարկության համար ՀՀ քաղաքացիները սկսել էին զանգվածաբար ժամանել հայրենիք արտերկրից։
Ընդդիմադիր խմբակցություններից քվեարկությանը մասնակցեց միայն «Հայաստան» խմբակցությունը, որը դեմ է քվեարկել ԸՕ փոփոխություններին։
Օրենսդրական փոփոխությունները կմտնեն ուժի մեջ պաշտոնական հրապարակման հաջորդ օրը։
