Հայաստանի արտաքին գործերի նախարարությունը (ԱԳՆ) շնորհավորել է Բելառուսի ժողովրդին՝ Անկախության օրվա առթիվ։ Այս մասին նախարարությունը հայտնել է X սոցիալական ցանցում հրապարակված հաղորդագրության մեջ։
Հաղորդագրության մեջ նշվում է, որ Հայաստանն իր ջերմ շնորհավորանքներն ու լավագույն մաղթանքներն է հղում Բելառուսի բարեկամ ժողովրդին։ Բնորոշ է, որ գրառման մեջ Բելառուսի պետական իշխանություններին ուղղված ոչ մի խոսք չկա։
Այս շնորհավորանքը հնչում է այն պայմաններում, երբ երկու երկրների միջև հարաբերությունները լարված են։ Իրավիճակը սրվել է 2024 թվականի հունվարին, երբ Բելառուսի նախագահ Ալեքսանդր Լուկաշենկոն հնչեցրել էր գնահատականներ Արցախյան պատերազմի արդյունքների վերաբերյալ։
Հայաստանի վարչապետ Նիկոլ Փաշինյանն այդ հայտարարությունից հետո հայտարարեց, որ Բելառուսի առաջնորդը փաստացի խոստովանել է, որ օգնել է Ադրբեջանին։ Դրանից հետո Հայաստանը Բելառուսի պետական պաշտոնյաներին արգելեց մեկնել իր երկիր՝ մինչև Ալեքսանդր Լուկաշենկոյի նախագահության ավարտը։
Հարաբերությունների սրման հետևանքով երկու երկրների արտաքին գործերի նախարարությունները 2024 թվականի հունիսին փոխանակեցին բողոքի նոտաներ։ 2024 թվականի օգոստոսին Երևանում Բելառուսի դեսպանատան շենքի վրա հանրահավաքի մասնակիցները շպրտել էին բանջարեղեն։ Իսկ 2024 թվականի դեկտեմբերին Նիկոլ Փաշինյանն ու Ալեքսանդր Լուկաշենկոն վիճաբանություն էին ունեցել Սանկտ Պետերբուրգում՝ Եվրասիական տնտեսական միության գագաթնաժողովի շրջանակում։
Այս տարվա ապրիլին Ազգային ժողովի նախագահ Ալեն Սիմոնյանը հայտարարեց, որ Հայաստանը «թույլ չի տա դարձնել գուբերնիա և չի կառավարվի Բելառուսի օրինակով»։ Մինսկը դա որակելով որպես «խիստ անընդունելի և պրովոկացիոն հայտարարություն»՝ Երևանին հանձնել է բողոքի նոտա։
