ՀՀ Ազգային Ժողովում քննարկվում է նախագծի փաթեթ, որի համաձայն՝ Հայաստանում մեկ տարվա ընթացքում 183 օրից քիչ ժամանակ գտնվող քաղաքացին կամ ռեզիդենտ կարող է զրկվել ընտրություններին և հանրաքվեներին մասնակցելու իրավունքից։
ԱԺ պետական-իրավական հարցերի մշտական հանձնաժողովի արտահերթ նիստում «Քաղաքացիական պայմանագիր» խմբակցության պատգամավոր Ալխաս Ղազարյանը ներկայացրեց «ՀՀ ընտրական օրենսգիրք» սահմանադրական օրենքում լրացումներ կատարելու և «Հանրաքվեի մասին» սահմանադրական օրենքում փոփոխություն կատարելու նախագծերը։
Ըստ նախագծի՝ ընտրությունների կամ հանրաքվեի օրվա նախորդող 48-րդ օրվա դրությամբ, իսկ ԱԺ արտահերթ ընտրությունների կամ նոր քվեարկության դեպքում՝ 28-րդ օրվա դրությամբ, պետք է ապացուցված լինի, որ անձը 365 օրվա ընթացքում Հայաստանում 183 օր և ավելի է գտնվել։
Ալխաս Ղազարյանը նշեց, որ նախագծի նպատակն է ընտրական գործընթացում ոչ միայն ֆորմալ, այլև բովանդակային կապը պետության և քաղաքացու միջև ամրապնդելը։
Այս նախագծին հակադրվել է «Հայաստան» խմբակցության պատգամավոր Գագիկ Համբարձումյանը, որը դեմ է արտահայտվել։ Նրա կարծիքով՝ նախագիծը հակասահմանադրական է և խախտում է անհատի ազատ տեղաշարժի իրավունքը։
Ալխաս Ղազարյանը պատասխանելով ընդդիմադրության մեղադրանքներին նշեց, որ նախագծի մշակողները հակասահմանադրականության հետ կապված հարցերն առաջնորդել են Տեղական ինքնակառավարման մարմինների մասին օրենքի կարգավորումներով։
Հիշեցնենք, որ նախկինում ՀՀ առողջապահության նախարար Անահիտ Ավանեսյանը հայտարարել էր, որ նման պահանջը կգործի նաև առողջապահության ապահովագրության համակարգում՝ 1 տարվա ընթացքում Հայաստանում 183 օր չգտնվող անձանց համար։
