Հայաստանի արդյունաբերողների և ձեռնարկատերերի միության ղեկավարները և հայ գործարարները այցելել են Վանի առևտրաարդյունաբերական պալատ, որտեղ հանդիպում են ունեցել իրենց թուրք գործընկերների հետ։ Այս հանդիպումը շարունակությունն է Կարս քաղաքում տեղի ունեցած նախորդ հանդիպմանը, որտեղ կողմերը քննարկել էին համագործակցության հնարավորությունները տրանսպորտի, լոգիստիկայի, զբոսաշրջության և առևտրի ոլորտներում։
Այս անգամ հանդիպումը կայացել է «Հայ-թուրքական հարաբերությունների կարգավորման աջակցություն. միջսահմանային կապերի ամրապնդում» նախագծի շրջանակներում։ Այն համարվում է առաջին պատասխան այցը դեռևս 2019 թվականին Հայաստանում տեղի ունեցած նախնական հանդիպումից հետո։
Հայաստանի արդյունաբերողների և ձեռնարկատերերի միության փոխնախագահ Արթուր Ղազարյանը նշել է, որ նախաձեռնության նպատակն է զարգացնել տնտեսական, սոցիալական և մշակութային կապերը երկու հարևան երկրների միջև։ Նա ընդգծել է, որ սահմանային անցակետերի բացումը կթույլ տա անմիջական կապ հաստատել թուրք գործարարների հետ։
Ղազարյանը հայտնել է, որ սեպտեմբերին ցանկանում է Երևանում կազմակերպել նմանատիպ հանդիպում՝ հյուրընկալելով գործարարներ Կարսից, Իգդիրից և Վանից։ Նա նշել է, որ այդ դեպքում կցանկանային ողջունել հյուրերին Ալիջանի սահմանային անցակետում, որը կլինի նրանց առաջին մուտքը Հայաստան։
Վանի առևտրաարդյունաբերական պալատի նախագահ Նեջդեթ Թաքվանը հավատում է, որ արդյունաբերողները և գործարարները կլինեն խաղաղության, բարօրության և համերաշխության համար աշխարհի ապագայի ամենակարևոր դերակատարներից։
