ԵԱՏՄ երկրների առաջնորդների հանդիպման ընթացքում Ռուսաստանի Դաշնության նախագահ Վլադիմիր Պուտինը և Բելառուսի Հանրապետության նախագահ Ալեքսանդր Լուկաշենկոն փոխանակել են կարճ մտքեր Հայաստանի հետ կապված իրադրության վերաբերյալ։
Այս մասին հայտնել է Կրեմլի մամուլի քարտուղար Դմիտրի Պեսկովը։ Նրա խոսքով՝ առաջնորդները մի քանի անգամ հանդիպման շրջանակում զրուցել են միմյանց հետ։
«Հայաստանի վերաբերյալ կարծիքների կարճ փոխանակում է եղել, սակայն առարկայական, մանրամասն քննարկում տեղի չի ունեցել, քանի որ ժամանակը սահմանափակ էր»,- ասել է Պեսկովը։
Նա նաև հավելել է, որ ոչ պաշտոնական ընթրիքի ընթացքում առաջնորդները հնարավորություն են ունեցել շատ ավելի լայն և ոչ թե պաշտոնական թեմատիկաներով զրուցելու։
Այս տարվա մայիսի 29-ին Աստանայում տեղի է ունեցել Եվրասիական տնտեսական միության (ԵԱՏՄ) գագաթնաժողովը։
