ՀՀ ԱԺ 9-րդ գումարման նստաշրջանում ընդդիմությունը կկարողանա օգտագործել գլխավոր քաղաքական ամբիոնը հասարակական կարծիք ձևավորելու համար, սակայն դա չի օգնի անվտանգության սպառնալիքների չեզոքացմանը։ Այս մասին ասաց ՀՀ նախկին վարչապետ և Ազգային ժողովի նախկին նախագահ Խոսրով Հարությունյանը՝ անդրադառնալով խորհրդարանում ընդդիմության ապագա աշխատանքին։
Իմ կարծիքով, նախորդ 5 տարվա ընթացքում ընդդիմությունը շատ ակտիվ է եղել, նույնիսկ երբեմն ագրեսիվ, բայց որևէ խնդիր չի հաջողվել լուծել։ Կարծում եմ՝ խորհրդարանում ընդդիմության դերը պետք է փոխվի։
Նրանք կբերեն օրենքների նախագծեր, կաղմուկ–աղաղակ անեն դրանց դեմ, ապա դրանք կքվեարկվեն և մեծամասնությամբ կանցնեն։ Ընդդիմությունը երբեք չի կարող ինքը որոշում կայացնել, դա բացառված է։ Իրականում, ընդդիմության ազդեցությունը պետք է այնպիսին լինի, որ քաղաքական մեծամասնությունը նրա դիրքորոշման հետ հաշվի նստի։
Իմ տեսակետով, օրենսդիրի և գործադիրի ջրբաժանը չի անցնում կառավարության և խորհրդարանի միջև, այլ անցնում է ԱԺ մեծամասնության և փոքրամասնության միջև։
Հարց բարձրացնելու հետ մեկտեղ պետք է հարց բարձրացնեն նաև այն մասին, թե որոնք են այն գործիքները, որոնցով օրենսդրորեն պետք է օժտված լինի ԱԺ–ում ներկայացված ընդդիմությունը։
Խորհրդարանական վերահսկողության արդյունավետության բարձրացման համար անհրաժեշտ է ընդդիմությանը տրամադրել ազդեցության լրացուցիչ ինստիտուցիոնալ մեխանիզմներ։ Օրինակ, ես առաջարկում եմ, որ ֆինանսաբյուջետային հարցերի հանձնաժողովի նախագահի պաշտոնը զբաղեցնի ընդդիմության ներկայացուցիչը։
Հունիսի 7-ին Հայաստանում տեղի ունեցած ԱԺ ընտրություններին մասնակցել էին 16 կուսակցություն և 2 դաշինք։ Նախնական արդյունքներով «Բարգավաճ Հայաստան» կուսակցությունը ստացել էր ընտրողների քվեների 4%-ը և կարող էր մտնել խորհրդարան։ Սակայն ԿԸՀ-ի որոշմամբ 3 ընտրատեղամասերի քվեարկության արդյունքները անվավեր ճանաչվեցին, ինչի հետևանքով կուսակցությունը կորցրեց 213 քվե և չկարողացավ հաղթահարել անցողիկ շեմը։ ԿԸՀ-ի վերջնական արդյունքների համաձայն՝ խորհրդարանում ՔՊ-ն կունենա 64, «Ուժեղ Հայաստանը»՝ 29, իսկ «Հայաստան» դաշինքը՝ 12 մանդատ։
